PENDAK RASA JEUNG ALLOH

Dawuh Alloh:
فَمَن كَانَ يَرْجُو لِقَاءَ رَبِّهِ فَلْيَعْمَلْ عَمَلًا صَالِحًا وَلَا يُشْرِكْ بِعِبَادَةِ رَبِّهِ أَحَدًا.
(AlKahfi 110)
"Saha nu palay tepang sareng Alloh maka kudu amal sholeh jeung ulah musyrik, ibadah kudu wungkul ka Alloh"
Di dunya bisa tepang rasa jg Alloh, Musyahadah, nyaksi kana sifat2 Rububiyyahna, yen diri urang didamel ku Alloh, yen diri taya tangan pangawasa, teu boga kabisa anging sadayana karunia Alloh. Teu kungsi menta panon, irung, ceuli, suku, leungeun, sadayana pamasihan jg fasilitas ti Alloh pikeun ibadah ka Anjeuna kalayan sampurna.
Nyaksi kana sifat istighnaiyyah, yen Alloh Maha beunghar, rizki nu katarima, kadahar, kapake, estu tina kabeungharan Alloh, tina rohmaniyyah sareng rohimiyyahna. Sagala kabutuh dicumponan ku Alloh, abdi mah darma usaha jg ikhtiyar, seja ibadah ku kasabna, anapon hasilna estu Gusti nyalira nu ngatur, da karaos usaha mah teu sabaraha, ari pamasihan murubut siang wengi, suka bungah, bagja waluya, sehat badan sehat akal, wungkul pamasihan Alloh nu Maha Beunghar.
Tepang rasa sareng Alloh sabab nyaksi kana sifat iftiqoriyyah, yen kasampurnaan Alloh dibutuhkeun ku diri.
Abdi peryogi kana kawasana Alloh, abdi peryogi kana sifat sama' bashorna Alloh, abdi peryogi kana Al Wahhab, Ar Rozzaq.
Karasa yen wungkul Alloh nu dipuntangan, wungkul Alloh nu tiasa dipenta tulung, da makhkuk mah kabeh lemah, teu aya kaboga, teu aya kabisa pikeun dipuntangan.
Syarat supaya bisa tepung rasa, kudu amal sholeh.
Lobakeun amal batan katungkul ku dunya. heulakeun ibadah mayun ka Alloh batan mikiran hirup jg kahirupan. Ganti Karesep tina pagaliwotah jg makhluk ku resep ibadah jeung amal. Pilih sibuk ku amal hade bari ninggalkeun sibuk ku urusan dunya.
In sya Alloh bakal tepang sareng Alloh asal amalna ikhlash murni, wungkul hoyong ridona, wungkul seja ibadah, wungkul ngarasa yen diri hamba Alloh.
وَمَا أُمِرُوا إِلَّا لِيَعْبُدُوا اللَّهَ مُخْلِصِينَ لَهُ الدِّينَ حُنَفَاءَ وَيُقِيمُوا الصَّلَاةَ وَيُؤْتُوا الزَّكَاةَ ۚ وَذَٰلِكَ دِينُ الْقَيِّمَةِ
Sing gilig tur yakin, ngan Alloh nu kudu di gugu, di taati parentah jg larangana.
In sya Alloh bakal dijemput ku Alloh pikeun tepang sareng anjeuna, tajalli, musyahadah, naek kayakinan kaimanan kana makom Waliyulloh. Di akhirat pasti pendak jg ningal ka Alloh langsung.